ප්‍රබුද්ධ

කතෘ	: මහගම සේකර
පරිවර්තනය	:
ප්‍රකාශනය	: ස්ටෑම්‍‍‍ප්‍රෑර්ඩ් ලේක් ප්‍රකාශකයෝ
මිල	: රු. 290.00
ISBN	: 955 8156 28 0
පිටු	: 116

හා එන්න! ප්‍රීති වෙන්න! ගී කියන්න පෙම්බරෝ! 
මේ වගේ සැපක් තවත් ලොවේ තියේද සුන්දරෝ! 
හැම් බේකන් කන්න සල්ලි 
ජින් ෂැම්පෙන් බොන්න සල්ලි්‍
බල්ලෝ මරාලා - හරි - සල්ලි හොයාලා
ඉන්න ටිකේ ඉම්මු සුදෝ ජොලිය දමාලා
හා එන්න! ප්‍රීති වෙන්න! ගී කියන්න පෙම්බරෝ! 
මේ වගේ සැපක් තවත් ලොවේ තියේද සුන්දරෝ! 

සිදුවුනේ අසිරියකි;

බඩ මහත දැඩි පිරිමි
සෙම බරිත තඩි ගැහැණු
කය පුබුදු වී අවුත්
මස සසල කොට නටත්:



හායි! බල්ලෝ මරාලා - හරි - සල්ලි හොයාලා

බඳ වටා අත් යවා ඔවුනොවුන් සිප වැළඳ
නොසිහියෙන්, සිහිනයෙන් 
මා පියන්, දූ පුතුන් මුනුබුරන්
මත් වී සුරා මතින්
මත් වී රාග මතින්
කලවමේ එක ගොඩේ කැලතෙමින්

ඉන්න ටිකේ ඉම්මු සුදෝ ජොලිය දමාලා!


කස පුපුරණ හඬ ඇසෙයි - මුදු හඬින් ඈ කොදුරයි
හුඟ කලකිනුයි දැක්කේ - ඇයි නාවේ ඒ පැත්තේ? 
දවුල් හේවිසි බෙර ද තම්මැට - හඬයි එකවර උමතු වූ ලෙස
එබෙන තෙරපෙන සෙනග අතරෙහි - දැඩිව අතකට අතක් අසුවිය
කවදාද එහි එන්නේ? 

ලබන සුමානේ එන්නම්
................................
එහෙනම් වරද්දන්න එපා ඔන්න !
අපි යනවා
චෙරියෝ !
............................

අළුත් කලිසමට යට නොකොට - ඇඳ රතු ටී ෂර්ට් එක
ලා පයෙහි ඔප් නැගූ මිරිවැඩිද - පීරා හිස මනා කොට
ලබන සතියේ දිනක සවස් කල - ඔහු පිලිපනි මඟට
ඇය දකින්නට යාමට - පුරවා ගෙන සිතෙහි නන් හැඟුම් සහ පැතුම්
.................................
සරි ද නොසරිද මා යන මේ ගමන ?

යම් දෝ නොයම්දෝ යන  - මහා දෙගිඩියාවෙන්
බොහෝ වෙලාවක් හු - සිටියේය බස් රිය පොලෙහි
නොදත්තේය රෑ වූ බව

කිසිවෙකු විසින් උරමත - තබන ලද්දෙන් සුමිතුරු අතක්
මිදී දැහැනින් අවධිවිය ඔහු

ඒ ඇගේ සැමියා විය‍; - බීමත් වි ඔහු සිටියේය

ඒයි, මචං! මොකද මෙතන? 
මං බීලා - පේනවනේ මං බීලා
අපි බොනවා - ඉතිං මොකද?

කාටවත්ම අපෙන් වැරුද්දක් නෑ නොව - නේද මචං
ඕනනං ගෑණි බනියි - ඒත් මොකද? 
බැන්නත් මගේම ගෑනිනේ බං - ඒකිත් හොඳ ගෑණි මචං !
ඊයේත් උඹ ගැන කිව්වා - උඹත් බොහොම හොඳ මිනිහලු
උඹ අද එන්න ඕනෑ මාත් එක්ක

පොඩි අඩියක් ගහන්න - අපේ ගෙදර
මං දන්නවා - උඹ හිත හොඳ මිනිහා
අනිත් එවුන් වාගේ නෙමෙයි - බෝතලයක් අරගෙන යං
වරෙං මචං! අපේ ගෙදර! 
අපි යං! - හප්

මහා සංවේගයක් ප්‍රබුද්ධට ඇතිවිය.

සැම්සන්! 
වරදින් මා මුදවන්නට බී ගෙන ආ
දෙවියෙකි නුඹ!

අහස් මාලිගාවකි - යශෝධරාගේ නිවස
සුදු පවුර - සුදු යකඩ ගේට්ටුව
කිරි ගරුඬ බිම වසන රත් පලස - නන් විසිතුරැ කැටයම් ගෘහ භාණ්ඩ
නොයෙක් රටවලින් ආ - නොයෙක් වයි වාරන්න
පළිඟු මිණි දැල් පහන් - සුව පහස්
යස ඉසුරු දකින විට - ප්‍රබුද්ධ තුළ අල්ප හැඟීමක් ඇතිවිය
පුපුරා ගොස් මෙතෙක් දවස් - රෑ සිහිනෙන් දිටු සිහිනය
මහා දාවල් - මහ පොලොවට ඇද වැඩුනා මෙන් විය
............................
යෝධයන් අතර අඟුටු මිට්ටෙකු සේය - නාඳුනන දුරු රටක අතරමං වූ සේය
...................................

දිස්වීය ඔහු නෙතට - කුරා කුහුඹුන් ලෙසට
පඩංගු පකිස් කෑලි - ටිං බෙලෙක්ක තහඩු
අස්සෙන් එබී බලන - මුඩුක්කු දහජරාව පැටව් ගැසුව
වැරහැලි කාලකන්නි මිනිස් ප්‍රාණ - දුගඳ පිරුණු කාණු දිගට

හමා ආයෙන් සිටත පිලිකුලක් - එ් අඳුරු කාණුවෙන්
වහා නෙත් ඉවත හැරවීය ඔහු - ප්‍රිය සම්භාෂණය දෙසට
..............................

අමු සොහොනක් නේද මේක ? - නාටකයක් නේද මේක?
මට මෙන් අසහනයක් නැත්ද ඔබට? - යසෝදා!
කියා දෙන්න මීට පිලියමක් - සොයා දෙන්න සිතට සැනසුමක්
ඔබ හැර යා නොහැකි හෙයින් - ඔබ නිසාම ඔබ සමගම
................................

බැස ගෙන බැසගෙන තරප්පු පේලිය ඉක්මන් ගමනින්
අවතිර්ණ විය - ඔහු - මහාමාර්ගයට

(පොතෙන් උපුටා ගැනීම්)

සේකරගේ මෙම - ප්‍රබුද්ධ යශෝධාගේ උපන්දින පාටියක යාම හා යශෝධා සමාගමය පිලිබඳ කලකිරී ඉවත්වීම - ලූෂන් බුලත්සිංහලයන්ගේ මෙම ගේය ප්‍රකාශනයට කෙතරම් ඉවහල් වී ඇත්ද?

විදුලි මිණි පහන් දැවී - බොළඳ ගී සිනා රැලි
නිලංකාර අඳුරේ සිරවී - සැදෑ සාදයේ
කුරා කුහුඹු මිනිසා වෙමි මා - ඔබේ මංදීරේ

එන්න කන්න බොන්න මිහිරේ - සැමටයි ආරාධනා
ඔබේ හඬ කිදී සිදී යයි - කථාසරිත් සාගරේ
පුරාගෙන පිරූ විතේ - විසුලු කෙලි නැටුම් සිනා
යොමා ඇස බලන් යලි සොඳුරේ මැදුර දොර දිහා

දෙන්න කන්න බොන්න නොකියා - දෙනෙතින් ආරාධනා
දෑත පා ඉඳුල් යදී ඇස් - ගයා හංස ගීතිකා
ඔබේ මංදිරෙන් එහා - මගේ ලොව බලාහිඳියි
පලා යයි ඔබේ ලොවින් මා - දෙපා සමුනොදී

ගායනය - ගුණදාස කපුගේ

කියවන්න හොඳ කථාවක් තියන කවි පොතක් - ප්‍රබුද්ධ